සිතුල්පව්ව හා තිස්සමහාරාම විහාරස්ථාන මූලික කර ගත් පොසොන් උත්සව මාලාව සම්බන්ධයෙන් සාකච්ඡාවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් ජනාධිපති කාර්යාලයේදී අද (08) පැවැත්විණි .
මෙම උත්සව මාලාව සඳහා පැමිණෙන සැදැහැවතුන්ට පහසුකම් සපයන ලෙස සිතුල්පව්ව රජ මහා විහාරයේ සහ තිස්සමහාරාම විහාරස්ථානවල විහාරාධිපති හිමිවරු ජනාධිපති ලේකම්වරයාගෙන් ඉල්ලීමක් කළහ.
විශේෂයෙන්ම කතරගම සිට සිතුල්පව්ව දක්වා මාර්ගය ස්ථීර ලෙස ප්‍රතිසංස්කරණය සඳහා අවශ්‍ය පියවර ගන්නා ලෙස සිතුල්පව්ව විහාරාධිකාරී ලෙල්වල සමිත හිමියෝ මෙහිදී ඉල්ලා සිටියහ.
ඒ අනුව, සිතුල්පව්ව සහ තිස්සමහාරාම රජමහා විහාරස්ථානවල පැවැත්වීමට නියමිත පොසොන් පින්කම් මාලාව සාර්ථක කර ගැනීම සඳහා අවශ්‍ය පියවර ගන්නා ලෙස ජනාධිපති ලේකම් ආචාර්ය නන්දික සනත් කුමානායක මහතා මෙහිදී නිලධාරීන්ට උපදෙස් ලබා දුන්නේය.
තිස්සමහාරාම විහාරාධිපති ආචාර්ය දේවාලේගම ධම්මසේන ස්වාමීන් වහන්සේ, ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ, හම්බන්තොට දිස්ත්‍රික් ලේකම් බිමල් ඉන්ද්‍රජිත් සිල්වා යන මහත්වරු සහ අදාළ රාජ්‍ය ආයතනවල ප්‍රධානීහු පිරිසක් මෙම අවස්ථාවට එක්ව සිටියහ.
ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.
