මාතර මිරිස්ස මධ්‍ය මහා විද්‍යාලයේ හා කුලියාපිටිය ගුණානන්ද මධ්‍ය මහා විද්‍යාලයේ සිසු දරුවන්හට ජනාධිපති ලේකම් කාර්යාලය විසින් සංවිධානය කෙරෙන ‘Vision’ වැඩසටහනටද සහභාගි වීමට අද (06) අවස්ථාව උදා විය.
ජනාධිපති කාර්යාලය, අධ්‍යාපන අමාත්‍යාංශය සහ පාර්ලිමේන්තු ජනසන්නිවේදන අංශය එක්ව පාසල් සිසුන් උදෙසා මෙම වැඩසටහන ක්‍රියාත්මක කරයි.
එහිදී “Clean Sri Lanka” වැඩසටහන සහ එහි සංකල්පමය වටිනාකම පිළිබඳව සිසුසිසුවියන් දැනුවත් කිරීමක්ද සිදු කෙරිණි.
ජනාධිපති අරමුදල ගම දක්වා ගෙන යාමට කටයුතු කළ බවත් ආර්ථික ගැටලු නිසා අධ්‍යාපනය හැදෑරීමට නොහැකි දරුවන්ට, මුදල් අවශ්‍යතා ඇති අයට ජනාධිපති අරමුදල මඟින් ආධාර ලබා ගැනීමේ හැකියාව තිබෙන බව ජනාධිපති ජ්‍යෙෂ්ඨ අතිරේක ලේකම් රෝෂාන් ගමගේ මහතා සඳහන් කළේය.
ජනතාවගේ බදු මුදලින් අධ්‍යාපනය ලබන ඔබ සියලු දෙනා වැඩිහිට පුරවැසියන් වන විට ජනතාව වෙනුවෙන් සේවය කිරීමට බැඳී සිටින බවද ජනාධිපති ජ්‍යෙෂ්ඨ අතිරේක ලේකම්වරයා මෙහිදී වැඩිදුරටත් කියා සිටියේය.
මෙම වැඩසටහනට සමගාමීව පරිසර සංරක්ෂණයේ වැදගත්කම තහවුරු කරමින් සංකේතාත්මක තිළිණයක් ලෙස පාසල් වෙත වටිනා පැළ ලබා දීම සහ ‘Vision’ සඟරාව පිළිගැන්වීමද සිදු කෙරිණි.
ජනාධිපති කාර්යාලයේ ත්‍රිවිධ හමුදා සම්බන්ධීකරණ අධ්‍යක්ෂ එයාර් කොමදෝරු ආසිරි ගාල්ලගේ, එහි සහකාර අධ්‍යක්ෂ මේජර් නදීක දංගොල්ල යන මහත්වරු, විදුහල්පතිවරු, ගුරු මහත්ම මහත්මීහු දෙමාපියන් ඇතුළු පිරිසක් මෙම අවස්ථාවට සහභාගි වූහ.
ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.
අවසන් යාවත්කාලීන දිනය: 6.08.2025
