Published on: ජනවාරි 17, 2025
ඩොලර් බිලියන 3.7ක දැවැන්ත සෘජු විදේශ ආයෝජනයක් රටට අත් කර දෙමින් ජනපතිගේ චීන රාජ්‍ය සංචාරයේ තෙවන දිනය සාර්ථකව නිමාවට පත් කෙරේ
චීනයේ ප්‍රමුඛ පෙළේ නිෂ්පාදන කර්මාන්ත ශාලා කිහිපයක් නැරඹීමට මෙන්ම දුප්පත්කම තුරන් කිරීම සඳහා ආදර්ශයක් වන චීන ගම්මානයක් නැරඹීමට ද හෙට ජනාධිපතිවරයා එක් වෙයි
ජනපති හෙට සිචුවාන් ප්‍රාන්තයේ කොමියුනිස්ට් පක්ෂයේ ලේකම්වරයා සමඟ ද
විශේෂ සාකච්ඡාවක
සිය චීන රාජ්‍ය සංචාරයේ තෙවන දිනය වන අද (16) දින ජනාධිපති අනුර කුමාර දිසානායක මහතා ශ්‍රී ලංකාවට ප්‍රතිලාභ රැසක් අත්කර දෙන විශේෂ සාකච්ඡා කිහිපයකට එක් විය.
ඒ අනුව අද පෙරවරුවේ විශේෂ ආයෝජන සැසියක් ජනාධිපති අනුර කුමාර දිසානායක මහතාගේ ප්‍රධානත්වයෙන් පැවැත්වුණු අතර චීනයේ ප්‍රමුඛ පෙළේ සමාගම්වල ප්‍රධානීන් සහ නියෝජිතයින් ඊට එක්ව සිටියහ.
ඉන් අනතුරුව ලෝක ප්‍රකට වෙළෙඳ නාම සහිත සමාගම් රැසක නියෝජිතයන් සමඟද ජනාධිපතිවරයා සාකච්ඡා වට කිහිපයකට එක් වූ අතර චයිනා පෙට්රොකෙමිකල් සංස්ථාව – සයිනොපෙක් සමූහය (China Petrochemical Corporation -SINOPEC Group), චයිනා සන්නිවේදන ඉදිකිරීම් සමාගම (China Communications Construction Company Ltd (CCCC), චයිනා මර්චන්ට් සමූහය (China Merchants Group (CMG), හුවාවි (Huawei) සහ වාහන නිෂ්පාදන ක්ෂේත්‍රයේ ප්‍රකට සමාගමක් වන බී.වයි.ඩී (BYD Auto) සමාගම ඇතුළු මහා පරිමාණ සමාගම් රැසක් ඊට අයත් වූහ.
සයිනොපෙක් සමූහයේ නියෝජිතයන් සමඟ පැවැති සාකච්ඡාවෙන් අනතුරුව ඩොලර් බිලියන 3.7ක දැවැන්ත සෘජු විදේශ ආයෝජනයක් ශ්‍රී ලංකාවට අත්පත් කර දෙමින් හම්බන්තොට තෙල් පිරිපහදුවක් ඉදිකිරීමට අදාළ ගිවිසුමට එළැඹීමද සිදු කෙරිණි.
මේ අතර අද පස්වරුවේ චීන මහජන විරුවන්ගේ ස්මාරකය වෙත පුෂ්පෝපහාර දැක්වීමට ජනාධිපතිවරයා එක් විය.
ඉන් අනතුරුව ජනාධිපති අනුර කුමාර දිසානායක මහතා සහ චීන ජාතික මහජන කොංග්‍රසයේ ස්ථාවර කමිටුවේ සභාපති ජාඕ ලජී මහතා අතර හමුවක් ද පැවැත්විය.
ජනාධිපති අනුර කුමාර දිසානායක මහතා සහ චීන අග්‍රාමාත්‍ය ලී ච්‍යං මහතා අතර ද්විපාර්ශ්වික සාකච්ඡා ආරම්භ කෙරුණේ ඉන් අනතුරුවයි. චීන – ශ්‍රී ලංකා අතීත මිතුදම සිහිපත් කරමින් ඉතා ඵලදායී සාකච්ඡාවකට මෙහිදී ජනාධිපතිවරයා සහ චීන අග්‍රාමත්‍යවරයා එක් වූ අතර “පොහොසත් රටක් – ලස්සන ජීවිතයක් ” ඇති කිරීමට වත්මන් රජය ගෙන යන වැඩ පිළිවෙළට චීනයේ සහාය ලබා දෙන බව චීන අග්‍රාමාත්‍යවරයා අවධාරණය කළේය.
ජනාධිපති අනුර කුමාර දිසානායක මහතාගේ චීන රාජ්‍ය සංචාරයේ අවසන් දිනය වන හෙට (17) දිනයේ චීනයේ ප්‍රමුඛ පෙළේ නිෂ්පාදන කර්මාන්ත ශාලා කිහිපයක් නැරඹීමට ජනාධිපතිවරයා එක්වීමට නියමිත අතර දුප්පත්කම තුරන් කිරීම සඳහා ආදර්ශයක් වන චීන ගම්මානයක් නැරඹීමට ද එක් වනු ඇත.
එමෙන්ම සිචුවාන් ප්‍රාන්තයේ කොමියුනිස්ට් පක්ෂයේ ලේකම්වරයා සමඟ විශේෂ සාකච්ඡාවකට ද ජනාධිපතිවරයා හෙට එක්වීමට නියමිතය.
විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, ප්‍රවාහන, මහා මාර්ග, වරාය හා සිවිල් ගුවන් සේවා අමාත්‍ය බිමල් රත්නායක, ශ්‍රී ලංකාවේ චීන තානාපති චී ජෙන්හොන්ග්, චීනයේ ශ්‍රී ලංකා තානාපති මජින්ත ජයසිංහ යන මහත්වරුද ජනාධිපතිවරයා සමඟ මෙම සංචාරයට එක්ව සිටියි.
