පාර්ලිමේන්තුව ආණ්ඩුවක් බවට පත් කර, රට ගොඩනැගීමේ තීන්දු තීරණ ගැනීම සර්ව පාක්ෂික ආණ්ඩුවක අරමුණ බව ජනාධිපති රනිල් වික්රමසිංහ මහතා පැවසීය.
සර්ව පාක්ෂික ආණ්ඩුවක් පිහිටුවීම පිළිබඳ ශ්රී ලංකා නිදහස් පක්ෂය සහ පාර්ලිමේන්තු මන්ත්රීවරුන් වන මහාචාර්ය ජී.එල්. පීරිස් හා ඩලස් අලහප්පෙරුම යන මහත්වරු ඇතුළු කණ්ඩායම අද (04) පස්වරුවේ ජනාධිපති කාර්යාලයේ දී රනිල් වික්රමසිංහ මහතා හමු වී සාකච්ඡා කළ අවස්ථාවේදී ජනාධිපතිතුමා මේ බව සඳහන් කළේය.
22 වන ආණ්ඩුක්රම ව්යවස්ථා සංශෝධන කෙටුම්පත මේ වන විට පාර්ලිමේන්තුවට ඉදිරිපත් කර ඇති බවත්, ඒ පිළිබඳ සාකච්ඡා කොට පොදු එකඟතාවකට එළැඹීම වඩාත් සුදුසු වන අතර ඊට සියලු දෙනාගේ සහාය අපේක්ෂා කරන බව ද රනිල් වික්රමසිංහ මහතා පැවසීය.
සැප්තැම්බර් පළමු සතියේ අන්තර්කාලීන අය-වැය පාර්ලිමේන්තුවට ඉදිරිපත් කිරීමට නියමිත අතර එමගින් ජනතාවට සහන ලබාදීමට බලාපොරොත්තු වන බව වික්රමසිංහ මහතා සඳහන් කළේය.
පාර්ලිමේන්තු ආංශික අධීක්ෂණ කමිටු වහාම ස්ථාපිත කිරීමට පියවර ගන්නා බවත් එහි සභාපතිවරුන්ට කාර්යාල පහසුකම් දීමට සැලසුම් කර ඇති බවත් පැවසූ ජනාධිපති රනිල් වික්රමසිංහ මහතා රාජ්ය සේවයෙන් ඉහළ කාර්යක්ෂම සේවාවක් රටට අවශ්ය බව ද කියා සිටියේය.
ආංශික අධීක්ෂණ කමිටු සභාපතිවරු කැබිනට් මණ්ඩලයට කැඳවීමට ද තමා සූදානම් බව වික්රමසිංහ මහතා පෙන්වා දුන්නේය.
ශ්රී ලංකා නිදහස් පක්ෂය ඉදිරිපත් කළ සර්ව පාක්ෂික ආණ්ඩුවක් පිළිබඳ යෝජනාවට ජනාධිපති රනිල් වික්රමසිංහ මහතා ගරු කිරීම පිළිබඳ ස්තූතිය පළ කළ මෛත්රීපාල සිරිසේන මහතා සර්ව පාක්ෂික ආණ්ඩුවක් වෙනුවෙන් සිය පක්ෂයේ සම්පූර්ණ සහාය ලබාදෙන බව පැවසීය.
ශ්රී.ල.නි.ප මහ ලේකම් දයාසිරි ජයසේකර මහතා කියා සිටියේ පිළිගත් ක්රමයකට සර්ව පාක්ෂික ආණ්ඩුවක් සැදිය යුතු බවයි. ඒ සඳහා සියලු දෙනා එක්ව එය සාර්ථක කරගත යුතු බවත් පෙන්වා දුන්නේය.
ජනතාව ඉල්ලූ වෙනස මේ වන විට සිදු වී ඇති බව පෙන්වා දුන් ශ්රී.ල.නි.ප. ජාතික සංවිධායක දුමින්ද දිසානායක මහතා, සුනාමි අවස්ථාවේ දී මෙන්ම යුද ජයග්රහණයේදීත් අත්හැරුණු අවස්ථා මේ මොහොතේ අත්නොහැර රට නිවැරදි මාවතට හරවාගැනීමට පියවර ගැනීම සියලු දෙනාගේ වගකීමක් බව ද පැවසීය.
සර්ව පාක්ෂික ආණ්ඩුවක් සඳහා ශ්රී ලංකා නිදහස් පක්ෂය ඉදිරිපත් කළ යෝජනා 11කින් සමන්විත වැඩපිළිවෙළෙ ද ජනාධිපති රනිල් වික්රමසිංහ මහතා වෙත ලබාදීම ද අද සිදු කෙරිණ.
රංජිත් සියඹලාපිටිය, ලසන්ත අලගියවන්න, ජගත් පුෂ්පකුමාර, අංගජන් රාමනාදන් යන පාර්ලිමේන්තු මන්ත්රීවරු ද මෙම සාකච්ඡාවට එක්ව සිටියහ.
මහාචාර්ය ජී.එල්. පීරිස් හා ඩලස් අලහප්පෙරුම යන මහත්වරු ඇතුළු කණ්ඩායම සමග පැවති සාකච්ඡාවේ දී ජනාධිපතිතුමා පවසා සිටියේ වසර 10කට ගැළපෙන ආර්ථික සැලැස්මක් සැකසීම සඳහා සියලු දෙනා එකාවන්ව ඊට පදනම දැමිය යුතු බවයි.
අරගලකරුවන්ගේ ආරම්භයට, ආර්ථිකයේ කඩා වැටීම සහ බඩගින්න හේතු වූ බව පෙන්වා දුන් රනිල් වික්රමසිංහ මහතා, අරගලකරුවන් අවසන් මොහොතේ ප්රචණ්ඩත්වයෙන් අරගලය අවසන් කළේ යැයි කියා සිටියේය.
එදා පාර්ලිමේන්තුව කලහකාරීන්ගෙන් ආරක්ෂා නොකළේ නම් අද ප්රජාතන්ත්රවාදය පිළිබඳ මේ ආකාරයෙන් එක්ව සාකච්ඡා කිරීමට ඉඩක් නොලැබෙන බව ද පැවසීය.
සර්ව පාක්ෂික ආණ්ඩුවක් පිළිබඳ සුබවාදී අපේක්ෂාවක් තිබෙනවා. එය කිසි සේත් වෙනස් විය යුතු දෙයක් නොවේ යැයි මහාචාර්ය ජී.එල්.පීරිස් මහතා පෙන්වා දුන්නේය.
මෙහිදී අදහස් දක්වමින් ඩලස් අලහප්පෙරුම මහතා කියා සිටියේ විධිමත් සර්ව පාක්ෂික ආණ්ඩුවක් සඳහා සාකච්ඡා කිරීමට සියලු දෙනා සූදානම් විය යුතු බවයි. ඩිලාන් පෙරේරා, චරිත හේරත්, නාලක ගොඩහේවා යන පාර්ලිමේන්තු මන්ත්රීවරු ද සාකච්ඡාවට එක්ව සිටියහ.
අග්රාමාත්ය දිනේෂ් ගුණවර්ධන, ජනාධිපති පාර්ලිමේන්තු කටයුතු උපදේශක මහාචාර්ය ආශු මාරසිංහ, ජනාධිපති ලේකම් සමන් ඒකනායක, ජනාධිපති අතිරේක ලේකම් නීතිඥ චමින්ද කුලරත්න යන මහත්වරු ද මෙම අවස්ථාවට සහභාගී වූහ.
ජනාධිපති මාධ්ය අංශය
2022-08-04
ජනාධිපති මාධ්ය අංශය අතිගරු ජනාධිපතිතුමාගේ දැක්ම, ක්රියාමාර්ග, තීරණ, ප්රකාශ තත් අයුරින්ම මාධ්ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්රවේශයක් මගින් විද්යුත්, මුද්රිත සහ නව මාධ්ය දායක කර ගැනේ. මාධ්ය අංශය රාජ්ය සහ පෞද්ගලික මාධ්ය ආයතන හා මාධ්යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්රයක් ලෙස ක්රියා කරයි. ඉහළ ප්රමිතියකින් යුත් මාධ්ය භාවිතයක් ඔස්සේ ජාතික ප්රතිපත්ති, සැලසුම් හා ක්රියාමාර්ග ජනතාවට පැහැදිලි කරයි. දුර්මත හඳුනා ගෙන සත්යය අනාවරණය කරයි.
