Published on: ජූනි 10, 2024

ශ්‍රී ලංකාවේ කෘෂි නවීකරණ වැඩපිළිවෙළට බංග්ලාදේශයේ සහාය

  • ජනපතිගේ නායකත්වයෙන් ශ්‍රී ලංකාවේ ආර්ථිකය ප්‍රකෘතිමත් තත්ත්වයට ගෙන ඒමට හැකිවීම පිළිබඳ සතුටු වෙනවා – බංග්ලාදේශ අගමැතිනී ෂෙයික් හසීනා මහත්මිය.
  • මැතිවරණයෙන් පසුව බංග්ලාදේශයේ සංචාරයකට එක් වෙනවා – ජනාධිපති රනිල් වික්‍රමසිංහ මහතා.

ශ්‍රි ලංකාවේ ක්‍රියාත්මක කෘෂි නවීකරණ වැඩසටහන සඳහා බංග්ලාදේශයේ සහාය ලබා දෙන බව බංග්ලාදේශ අගමැතිනී ෂෙයික් හසීනා මහත්මිය ජනාධිපති රනිල් වික්‍රමසිංහ මහතා හමුවේ සහතික වූවාය.

ඉන්දීය අග්‍රාමාත්‍ය නරේන්ද්‍ර මොදි මහතාගේ දිවුරුම් දීමේ උත්සවය සඳහා නවදිල්ලි නුවරට ගොස් සිටින ජනාධිපති රනිල් වික්‍රමසිංහ මහතා සහ බංග්ලාදේශ අගමැතිනී ෂෙයික් හසීනා මහත්මිය අතර ද්විපාර්ශ්වික සාකච්ඡා අද (10) පෙරවරුවේ පැවැත්වුණු අතර එහිදී බංග්ලාදේශ අගමැතිනිය මේ බව සඳහන් කළාය.

සමූපකාර ක්‍රමවේදය අනුව බංග්ලාදේශයේ ක්‍රියාත්මක වන කෘෂිකර්ම නවීකරණ වැඩසටහන අධ්‍යයනය කොට එහි අත්දැකීම් ද ලබා ගනිමින් ශ්‍රී ලංකාවේ කෘෂි නවීකරණ වැඩසටහන සාර්ථක කර ගැනීම සඳහා ලාංකික කෘෂි ප්‍රවීණයන්ගෙන් සමන්විත කණ්ඩායමක් බංග්ලාදේශයට යැවීමට ද ජනාධිපති රනිල් වික්‍රමසිංහ මහතා මෙහිදී එකඟතාවය පළ කළේය.

බංග්ලාදේශය සහ ශ්‍රී ලංකාව අතර නිදහස් වෙළෙඳ ගිවිසුමක් අත්සන් තැබීම සම්බන්ධයෙන්ද මෙහිදී නායකයන් සාකච්ඡා කළ අතර ඉන්දීය නිදහස් වෙළඳ ගිවිසුමේ කටයුතු අවසන් වූ පසුව බංග්ලාදේශය සමඟද නිදහස් වෙළෙඳ ගිවිසුමක් අත්සන් තැබීමට හැකියාව පවතින බව ජනාධිපති රනිල් වික්‍රමසිංහ මහතා පෙන්වා දුන්නේය.

බංග්ලාදේශයේ පෞද්ගලික ආයෝජකයන් ශ්‍රී ලංකාවේ ආයෝජන අවස්ථා සඳහා යොමු කරන බවට ද බංග්ලාදේශ අගමැතිවරිය ජනාධිපති රනිල් වික්‍රමසිංහ මහතා වෙත පොරොන්දු වූවාය. දෙරටේ ආයෝජන මණ්ඩල සම්බන්ධීකරණය කරමින් මෙම කටයුතු ඉදිරියට පවත්වාගෙන යාමට ද නායක දෙපළ සාකච්ඡා කළහ.

ශ්‍රී ලංකාව සහ බංග්ලාදේශය අතර මගී ප්‍රවාහන නෞකා සේවයක් ආරම්භ කිරීම සම්බන්ධයෙන්ද මෙහිදී අවධානය යොමු කෙරිණි.

බංග්ලාදේශයේ පැවැත්වෙන බිම්ස්ටේක් සමුළුවට සහභාගී වන ලෙස මෙහිදී බංග්ලාදේශ අගමැතිවරිය ජනාධිපති රනිල් වික්‍රමසිංහ මහතාට ආරාධනා කළ අතර එම සමුළුව පැවැත්වෙන දින වකවානු ශ්‍රී ලංකාවේ මැතිවරණ කාලයක් බැවින් ඒ සඳහා අග්‍රාමාත්‍ය දිනේෂ් ගුණවර්ධන සහ විදේශ අමාත්‍ය අලි සබ්‍රි යන මහත්වරුන් සහභාගී කරවන බව ජනාධිපති රනිල් වික්‍රමසිංහ මහතා බංගලාදේශ අගමැතිවරියට දැනුම් දුන්නේය.

මැතිවරණයෙන් පසුව තමා බංග්ලාදේශයේ සංචාරයකට පැමිණෙන බවට ද ජනාධිපතිවරයා බංග්ලාදේශ අගමැතිවරිය වෙත පොරොන්දු විය.

මෙහිදී අදහස් දැක් වූ බංග්ලාදේශ අගමැතිනී ෂෙයික් හසීනා මහත්මිය වැඩිදුරටත් සඳහන් කළේ ජනාධිපති රනිල් වික්‍රමසිංහ මහතාගේ නායකත්වය යටතේ ශ්‍රී ලංකාවේ ආර්ථිකය ප්‍රකෘතිමත් තත්ත්වයට ගෙන ඒමට හැකිවීම පිළිබඳ තමා බෙහෙවින් සතුටට පත්වන බවයි.

එම කටයුතු වෙනුවෙන් බංග්ලාදේශයෙන් මෙන්ම ඉන්දියාවෙන් ලැබුණු සහයෝගය මෙහිදී සිහිපත් කළ ජනාධිපති රනිල් වික්‍රමසිංහ මහතා ඒ වෙනුවෙන් සිය කෘතවේදීත්වය පළ කර සිටියේය.

ජනාධිපති ලේකම් සමන් ඒකනායක, විදේශ කටයුතු අමාත්‍යාංශයේ ලේකම් අරුණි විජේවර්ධන, ඉන්දියාවේ ශ්‍රී ලංකා මහකොමසාරිස් ෂෙනුකා සෙනවිරත්න, ජනාධිපති පෞද්ගලික ලේකම් සැන්ඩ්‍රා පෙරේරා යන මහත්ම මහත්මීන් ඇතුළු ශ්‍රී ලංකා දූත පිරිස සහ බංග්ලාදේශ දූත පිරිස මෙම අවස්ථාවට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.