ලොව ශ්රේෂ්ඨතම වෘත්තීන් අතර ගුරු වෘත්තිය මුල් තැන ගන්නේ ලෝකයේ හා මනුෂ්ය වර්ගයාගේ රඳා පැවැත්ම සඳහා වූ මග නොමග පසක් කරන මාර්ගෝපදේශකයා ගුරුවරයා වන හෙයිනි.
ගුරුවරයා යනු ප්රඥාවේ සහ හදවතේ එකතුවකි. එබැවින් ගුරු සේවාව වෘත්තියක්ම නොව සේවයකටත් එහා ගිය වගකීමක් බව පොදු පිළිගැනීම වන අතර ගුරුවරයා සමාජයෙහි ඉහළින්ම ඔසවා තබා ඇත්තේ ඒ නිසාමය. අප ලෝක ගුරු දිනය සමරනු ලබන්නේ එතරම් අභිමානවත් මෙහෙවරක නියැලෙන ගුරුවරයාට උපහාර පුද කිරීමටය.
ගුරුවරයා සහ ගුරු වෘත්තිය වෙනුවෙන් වූ වගකීම් නොපිරිහෙළා ඉටු කිරීමට රජයක් ලෙස අප බැඳි සිටින්නෙමු. දේශපාලනය මත ගුරු පත්වීම් ලබාදීම අත්හිටුවා විද්යාපීඨ ක්රමය ඇති කිරීමටත්, ගුරුවරයාට දියුණු ලෝකය සමග මුසුවීමේ අවස්ථාව සලසමින් ඉංග්රීසි භාෂාව හැදෑරීම සඳහා විශේෂ පුහුණුවක් ලබාදීමටත් එදා මම අධ්යාපන අමාත්යවරයා ලෙස පියවර ගත්තේ ගුරු වෘත්තියේ ගෞරවය ආරක්ෂා කිරීම උදෙසාම බව සිහිපත් කරමි.
රජය දරුවන් වෙනුවෙන් පැහැබර අනාගතයක් සැලසුම් කරමින් සිටින මෙම අවස්ථාවේ ඔවුන්ට අධ්යාපනය ලබාදීමේ වගකීමට උරදී සිටින ගුරවරුන් තම වගකීම් නිසි ලෙස ඉටුකරනු ඇතැයි මම අපේක්ෂා කරන අතර සමස්ත ගුරු භවතුන්ට අර්ථවත් ගුරු දිනයක් වේවා යි සුභාශිංසනය කරමි.
ජනාධිපති මාධ්ය අංශය අතිගරු ජනාධිපතිතුමාගේ දැක්ම, ක්රියාමාර්ග, තීරණ, ප්රකාශ තත් අයුරින්ම මාධ්ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්රවේශයක් මගින් විද්යුත්, මුද්රිත සහ නව මාධ්ය දායක කර ගැනේ. මාධ්ය අංශය රාජ්ය සහ පෞද්ගලික මාධ්ය ආයතන හා මාධ්යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්රයක් ලෙස ක්රියා කරයි. ඉහළ ප්රමිතියකින් යුත් මාධ්ය භාවිතයක් ඔස්සේ ජාතික ප්රතිපත්ති, සැලසුම් හා ක්රියාමාර්ග ජනතාවට පැහැදිලි කරයි. දුර්මත හඳුනා ගෙන සත්යය අනාවරණය කරයි.
