Published on: ජනවාරි 4, 2024

මෙවර තෛපොංගල් සැමරුමෙන් පසුව රාජ්‍ය සේවකයන්ට සහන

  • රටේ ආර්ථිකය ස්ථාවර කිරීමත් සමඟ සියලු ජනතාවට ආර්ථික සහන ලබාදීමට කටයුතු කරනවා.
  • පසුගිය වසරේ සිදු කළ ආර්ථික ප්‍රතිසංස්කරණ නිසා ගෙවීමට තිබු සියලු බිල්පත් මේ වන විට ගෙවා අවසන්.
  • 2025 වන විට නැවත පදිංචි කිරීම් සියල්ල අවසන් කිරීමට උපදෙස්.
  • අතුරුදන් වූවන් පිළිබඳ සොයා බැලිමේ කටයුතු කඩිනම් කරනවා.
  • උතුරේ ඉඩම් ගැටලුව කඩිනමින් විසඳීමට ඉඩම් අමාත්‍යාංශයේ නිලධාරීන් උතුරට.
  • උතුරු පළාත කෘෂිකර්මාන්තයේ කේන්ද්‍රස්ථානයක් බවට පත් කරනවා.
  • උතුර මෙන්ම රටම සංවර්ධනය කිරීමට එක්වන ලෙස උතුර නියෝජනය කරන සියලු මන්ත්‍රීවරුන්ට ආරාධනා.
  • ආයෝජනය සඳහා ඩයස්පෝරාවටත් ඇරයුම් – යාපනය හා කිලිනොච්චි දිස්ත්‍රික්කයන්හි විශේෂ සම්බන්ධීකරණ කමිටු රැස්වීමේදී ජනපති පවසයි.

සියලු ජනතාවට ආර්ථික අපහසුතා තිබෙන බව තමන් හොදින් දන්නා බවත්, මෙවර තෛපොංගල් සැමරුමෙන් පසුව රාජ්‍ය සේවකයන්ට යම් ආර්ථික සහනයක් ලැබෙනු ඇති බවත් ජනාධිපති රනිල් වික්‍රමසිංහ මහතා පැවසීය.

රටේ ආර්ථිකය ස්ථාවර කිරීමත් සමඟ සියලු ජනතාවට ආර්ථික සහන ලබාදීමට කටයුතු කරන බවද ජනාධිපතිවරයා සඳහන් කළේය.

එමෙන්ම පසුගිය වසරේ සිදු කළ ආර්ථික ප්‍රතිසංස්කරණය නිසා ගෙවීමට තිබු සියලු බිල්පත් මේ වන විට ගෙවා අවසන් කර ඇති බවත්, ඉදිරි කාර්තු හතර තුළ ආර්ථිකය ශක්තිමත් කර ගැනීමට අවශ්‍ය සියළු පියවර ගෙන ඇති බවත් ජනාධිපති රනිල් වික්‍රමසිංහ මහතා වැඩිදුරටත් සදහන් කළේය.

එසේම මෙම වසර අවසන් වන විට ආර්ථික වර්ධන වේගය 3% ක් දක්වා වැඩි කිරීමට කටයුතු කරන අතර 2025 දී එය 5% ක් දක්වා වර්ධනය කිරීමට සැලසුම් කර ඇති බවද ජනාධිපතිවරයා අනාවරණය කළේය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ යාපනය දිස්ත්‍රික් ලේකම් කාර්යාලයේ අද (04) පැවති යාපනය හා කිලිනොච්චි දිස්ත්‍රික්කයන්හි විශේෂ සම්බන්ධීකරණ කමිටු රැස්වීමට එක්වෙමිනි.

2025 වන විට අවතැන් වූ ජනතාව නැවත පදිංචි කිරීම් සියල්ල සිදු කර අවසන් කරන ලෙසද ජනාධිපති රනිල් වික්‍රමසිංහ මහතා මෙහිදී උතුරු පළාත් රාජ්‍ය නිලධාරීන්ට උපදෙස් දුන්නේය.

කිසිඳු අවතැන් පුද්ගලයෙක් 2025 වන විට ශ්‍රී ලංකාව තුළ සිටිය නොහැකි බවත් ඔවුන්ට අවශ්‍ය පහසුකම් ලබාදී ජීවත්වීමේ අයිතිය තහවුරු කිරීමට කඩිනමින් කටයුතු කරන ලෙසත් ජනාධිපතිවරයා නිලධාරීන්ට වැඩිදුරටත් දැනුම් දුන්නේය.

යාපනය දිස්ත්‍රික්කයේ ප්‍රාදේශීය ලේකම් කොට්ඨාශ 15ම ආවරණය වන පරිදි ලියාපදිංචි කර ඇති අතුරුදන් වූවන්ගේ සංඛ්‍යාව 1788කි. ඊට අදාළ පැමිණිලි 1289 කට සම්මුඛ පරීක්ෂණ පවත්වා තිබේ.

ඉතිරිව පවතින 500 ක පමණ පැමිණිලි සංඛ්‍යාව කඩිනමින් විභාග කරන ලෙස මෙහිදී නිලධාරීන්ට උපදෙස් දුන් ජනාධිපතිවරයා ඉදිරි මාස හය ඇතුළත එම කාර්යය අවසන් කිරීම සඳහා අතුරුදන් වූවන්ගේ කාර්යාලය සමග සම්බන්ධ වී කටයුතු කරන ලෙස ද උපදෙස් දුන්නේය.

යාපනය සහ කිලිනොච්චි දිස්ත්‍රික්කවල දේශපාලන අධිකාරිය මෙන්ම රාජ්‍ය නිලධාරීන් ද සහභාගී වී සීටී මෙම රැස්වීමේදී එම දිස්ත්‍රික්ක තුළ මෙතෙක් ක්‍රියාත්මක සංවර්ධන ව්‍යාපෘති, ඉදිරි සැලසුම් සහ එහිදී මතුව ඇති ගැටලු පිළිබඳ පුළුල් ලෙස විමසා බැලිනි.

නැවත පදිංචි කිරීම්, අධ්‍යාපන ,සෞඛ්‍ය, ඉඩම් , ධීවර, කෘෂිකර්ම සහ වන සංරක්ෂණ යන ක්ෂේත්‍ර පිළිබඳ සහ උතුරේ සංවර්ධන වැඩපිළිවෙළ පිළිබඳ මෙහිදී ජනාධිපති රනිල් වික්‍රමසිංහ මහතාගේ විශේෂ අවධානය යොමු කෙරිණි.

උතුරු පළාත සංවර්ධනයට අවශ්‍ය සැලැස්ම සකස් කරමින් උතුර වේගවත් දියුණුවක් කරා ගෙන යාමේ වැඩපිළිවෙළට එක්වන ලෙස උතුරු පළාත නියෝජනය කරන සියලු මන්ත්‍රීවරුන්ට ආරාධනා කළ ජනාධිපතිවරයා සියලුදෙනා එක්ව රටේ ආර්ථිකය ගොඩනැගීමේ වැඩපිළිවෙළ කඩිනම් කළයුතු බවද අවධාරණය කළේය.

එමෙන්ම නව ආර්ථික කොමිසම ස්ථාපිත කිරීමෙන් පසු ඕනෑම අයෙකුට මෙරටට පැමිණ අයෝජනය කිරීමට අවස්ථාව සැලෙසන බවද පැවසූ ජනාධිපති රනිල් වික්‍රමසිංහ මහතා ඒ සඳහා එක්වීමට විදේශගතව සිටින ඩයස්පෝරාවට ආරාධනා කරන බව ද පැවසීය.

උතුරේ බලශක්තිය සුරක්ෂිත කරමින් බලශක්තිය අපනයනය සඳහා රට සූදානම් කිරීමට සැලසුම් කර ඇති බවත් ඒ සඳහා පුනරීන් බලශක්ති මධ්‍යස්ථානයක් ලෙස ගොඩනඟන බවත් ජනාධිපති රනිල් වික්‍රමසිංහ මහතා වැඩිදුරටත් සඳහන් කළේය.

උතුරේ කෘෂිකර්මාන්තය නවීකරණයට නතුකරමින් උතුරු පළාත මෙරට කෘෂිකර්මාන්තයේ කේන්ද්‍රස්ථානයක් බවට පත් කිරීමට කටයුතු කරන බවද ජනාධිපතිවරයා පැවසීය.

උතුරු පළාතේ ඉඩම් නිදහස් කිරීමේ කටයුතු කඩිනම් කිරීමේ අවශ්‍යතාවය පිළිබඳවද මෙහිදී ජනාධිපතිවරයා නිලධාරින්ගේ අවධානයට යොමු කළ අතර පලාලි ගුවන්තොටුපළ සහ ආරක්ෂක අංශ සඳහා අවශ්‍ය ඉඩම් ප්‍රමාණය පිළිබඳ මෙම පෙබරවාරි මස වන විට අවසන් තීරණයකට එළැඹෙන බවද සඳහන් කළේය.

යාපනයට පැමිණ උතුරේ ඉඩම් ප්‍රශ්නය කඩිනමින් විසඳීමට පියවර ගන්නා ලෙස ඉඩම් අමාත්‍යංශයේ නිලධාරීන්ට උපදෙස් ලබා දෙන බවද ජනාධිපතිවරයා පැවසිය.

උතුරේ ජල ප්‍රශ්නයට විසදුම් ලබාදීම වෙනුවෙන් ජල යෝජනා ක්‍රම දෙකක් සඳහා මෙවර අයවැයෙන් මුදල් වෙන් කර තිබෙන බවත්, මීට පෙර ක්‍රියාත්මක කර තිබූ ජල ව්‍යාපෘති සදහා ගෙවීමට නියමිත මුදල් ද මේ වන විට ලබාදීමට පියවර ගෙන ඇති බවත් ජනාධිපති රනිල් වික්‍රමසිංහ මහතා සඳහන් කළේය.

මහා මාර්ග හා ජනමාධ්‍ය අමාත්‍ය බන්දුල ගුණවර්ධන, ධීවර අමාත්‍ය ඩග්ලස් දේවානන්දා, උතුරු පළාත් ආණ්ඩුකාර පී.එස්.එම්. චාල්ස්, පාර්ලිමේන්තු මන්ත්‍රීවරුන් වන වජිර අබේවර්ධන, ධර්මලිංගම් සිද්ධාර්න්, අංගජන් රාමනාදන්, ජනාධිපති ලේකම් සමන් ඒකනායක, උතුරු පළාත් ජනාධිපති සම්බන්ධීකරණ ලේකම් එම්. ඉලංගෝවන් , ජනාධිපති වෘත්තීය සමිති අධ්‍යක්ෂ ජනරාල් සමන් රත්නප්‍රිය, ප්‍රජා කටයුතු පිළිබඳ ජනාධිපති අධ්‍යක්ෂ ජනරාල් රජිත් කීර්ති තෙන්නකෝන්, යාපනය දිස්ත්‍රික් ලේකම් අම්බලවාණන් ශිව පාදසුන්දරන්, කිලිනොච්චි දිස්ත්‍රික් ලේකම් පති රූපාවතී කේතීශ්වරන් යන මහත්ම මහත්මින් සහ උතුරු පළාත නියෝජනය කරන මහජන නියෝජිතයන් සහ රාජ්‍ය නිලධාරීන් මීට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.