Published on: මාර්තු 4, 2024

පුරාවිද්‍යා උරුමය රැකීමට නව පනතක් ගෙන එනවා – බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක

මෙරට පුරාවස්තු හා පුරාවිද්‍යා උරුමය, සොයා ගැනීම මෙන්ම ඒවා සංරක්ෂණය කර මතු පරපුරට දායාද කිරීම විධිමත්ව සිදු කිරීම සඳහා පුරාවිද්‍යා දෙපාර්තමේන්තුව සමඟ එක්ව නව පනතක් කෙටුම්පත් කිරීමට කටයුතු කරමින් සිටින බව බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක මහතා පැවසීය.

එමෙන්ම “භික්ෂූ කතිකාවත් පනත” සකස් කිරීමට බලාපොරොත්තු වන බව ද අමාත්‍යවරයා සඳහන් කළේය.

බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (04) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක් වෙමිනි.

එහිදී වැඩිදුරටත් අදහස් දැක්වූ අමාත්‍යවරයා මෙසේ ද පැවසීය,

දුෂ්කර තත්ත්වයන් යටතේ පවත්වාගෙන යන පූජනීය ස්ථාන ආරක්ෂා කර ගැනීම සඳහා අත්‍යවශ්‍ය ප්‍රතිසංස්කරණ සිදුකිරීමට අවශ්‍ය මූල්‍ය ප්‍රතිපාදන ලබාදීමට අප අමාත්‍යාංශය අවධානය යොමු කර තිබෙනවා. ඊට අදාල ලේඛන මේ දිනවල පරීක්ෂා කරමින් සිටිනවා. අමාත්‍යාංශයේ අපේක්ෂාව වී තිබෙන්නේ එම මූල්‍ය ප්‍රතිපාදන 2024 මාර්තු මස 15 වනදාට පෙර අදාල පූජනීය ස්ථාන වෙත ලබාදීමටයි.

මෙරට පුරාවස්තු, පුරාවිද්‍යා උරුමය, සොයා ගැනීම මෙන්ම ඒවා සංරක්ෂණය කර මතු පරපුරට දායාද කිරීම විධිමත්ව සිදු කිරීම සඳහා පුරාවිද්‍යා දෙපාර්තමේන්තුව සමඟ එක්ව නව පනතක් කෙටුම්පත් කිරීමට කටයුතු සිටිනවා. එහි අන්තර්ගත ඇතැම් විෂයන් පිළිබඳව මූලික නීති සකස් කිරීමට ද අප කටයුතු කරන බව පැවසිය යුතුයි.

ඒ සඳහා විවිධ පාර්ශ්වයන් වෙතින් අදහස් හා යෝජනා ලබා ගනිමින් සිටින බව ද සඳහන් කළ යුතුයි.

එමෙන්ම භික්ෂූ කතිකාවත් පනත සකස් කිරීමට ද අප බලාපොරොත්තු වනවා. ඒ වෙනුවෙන් වන යෝජනා මහා නායක හිමිවරුන් ඇතුළු කාරක සංඝ සභා මඟින් ලබා දෙන ලෙස අප දන්වා තිබෙනවා. මෙය පහසු කටයුත්තක් නොවෙයි. නමුත් බහුතර විශ්වාසය වී තිබෙන්නේ එමඟින් භික්ෂු විනය ඇතුළු බොහෝ ගැටලු විසඳා ගැනීමට හැකිවනු ඇති බවයි.

ඒ වගේම ශ්‍රී ලංකාව ථේරවාදී ජාත්‍යන්තර බෞද්ධ මධ්‍යස්ථානය බවට පත් කිරීමේ ජනාධිපති රනිල් වික්‍රමසිංහ මහතාගේ සංකල්පය ක්‍රියාවට නැඟීම වෙනුවෙන් අප අමාත්‍යාංශයක් ලෙස සැදී පැහැදී සිටිනවා.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.