Published on: පෙබරවාරි 2, 2024

දිළිඳුකම පිටුදැකීම සහ දරුවන්ගේ පෝෂණය ඉහළ නැංවීම වෙනුවෙන් ජනපති විශේෂ අවධානයකින් කටයුතු කරනවා

  • කිසිසේත් දේශපාලනීකරණය නොවූ “අස්වැසුම” ජනතාවගේ දිළිඳුකම පිටුදැකීමේ සැබෑම වැඩසටහනක්- සාගල රත්නායක මහතා.

මෙරට ජනතාවගේ දිළිඳුකම පිටුදැකීම සහ දරුවන්ගේ පෝෂණය ඉහළ නැංවීම වෙනුවෙන් ජනාධිපති රනිල් වික්‍රමසිංහ මහතා ප්‍රමුඛ අවධානයක් යොමු කර කටයුතු කරන බවත්, ඒ වෙනුවෙන් ජනාධිපතිවරයාගේ මඟපෙන්වීම ඇතිව මේ වන විට වැඩසටහන් රැසක් ක්‍රියාවට නංවා තිබෙන බවත් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක මහතා පැවසීය.

ඒසේම ජනාධිපතිවරයාගේ සංකල්පයක් මත ආරම්භ කෙරුණු “අස්වැසුම” වැඩසටහන මෙරට දිළිඳුකම පිටුදැකීම සඳහා පුරෝගාමී මෙහෙවරක් ඉටු කරන බවත් කිසිසේත් දේශපාලනීකරණය නොවූ අස්වැසුම මෙරට ජනතාවගේ දිළිඳුකම පිටුදැකීම වෙනුවෙන් ශක්තිමත් දායකත්වයක් ලබාදෙනු ඇති බවත් ඒ මහතා පැවසීය.

සාගල රත්නායක මහතා මේ බව සඳහන් කර සිටියේ ඊයේ (01) කොළඹ රාමඩා හෝටල් පරිශ්‍රයේ දී පැවැත්වුණු සබලකෘත සහල් (Fortified Rice) පාසල් දරුවන්ගේ දිවා ආහාර වේලට එකතු කිරීමේ වැඩසටහනෙහි සමාරම්භක අවස්ථාවට එක් වෙමිනි.

පාසල් දරුවන්ගේ පෝෂණ තත්ත්වය ඉහළ නැංවීම අරමුණු කර ගනිමින් කෘෂිකර්ම හා වැවිලි කර්මාන්ත අමාත්‍යාංශය, අධ්‍යාපන අමාත්‍යාංශය, ලෝක ආහාර වැඩසටහන (World Food Programme), ආහාර ප්‍රවර්ධන මණ්ඩලය, බිල් සහ මෙලින්ඩා ගේට්ස් පදනම (Bill & Melinda Gates Foundation) ඒකාබද්ධව මෙම වැඩසටහන ක්‍රියාත්මක කරනු ලබයි.

එසේම දරුවන්ගේ රක්තහීනතාවය, මතක දුර්වලතා සහ ශරීර වර්ධනය අඩාල වීම ඇතුළු ඒ ආශ්‍රිත රෝග සඳහා පිළියම් සෙවීම ද මෙමඟින් අපේක්ෂා කෙරේ.

යකඩ සහ ෆෝලික් අම්ල අඩංගු කර සකස් කරන ලද සබලකෘත සහල් අධ්‍යාපන අමාත්‍යාංශයට නිල වශයෙන් භාර දීම මෙහිදී සිදු කෙරිණි.

මෙහිදී අදහස් දැක්වූ සාගල රත්නායක මහතා වැඩිදුරටත් පෙන්වා දුන්නේ අනාගත පරපුර නිරෝගී පරපුරක් ලෙස ගොඩනැඟීම අත්‍යවශ්‍ය වන බවත් පෝෂණය යනු කුසගින්න නිවා දැමීම පමණක් නොව රටේ අනාගතය හැඩගැස්වීමේදී තීරණාත්මක කාර්යභාරයක් ඉටු කරනු ලබන සාධකයක් බවත්ය.

මෙම වැඩසටහන ක්‍රියාවට නැංවීම සඳහා විවිධ පාර්ශ්ව වෙතින් ලැබෙන සහාය පිළිබඳ ස්තුතිය පළ කළ ඒ මහතා විශේෂයෙන් බිල් ඇන්ඩ් මෙලින්ඩා ගේට්ස් (Bill and Melinda Gates) පදනම වෙතින් ලද සහයෝගය ඇගයීමට ලක් කළේය.

පාසල් දරුවන්ගේ පෝෂණය ඉහළ නැංවීමට මෙතෙක් ක්‍රියාත්මක වූ වැඩසටහන් පිළිබඳවද මෙහිදී සිහිපත් කළ සාගල රත්නායක මහතා ලෝක ආහාර වැඩසටහනේ මැදිහත් වීමෙන් 2003 වර්ෂයේ දී මෙම පෝෂණ වැඩසටහන සඳහා වූ මුලපිරීම සිදු කෙරුණු බවද කියා සිටියේය.

වැඩිදුරටත් අදහස් දැක්වූ සාගල රත්නායක මහතා මෙසේ ද පැවසීය,

උතුර සහ නැඟෙනහිර යන පළාත්වල දිස්ත්‍රික්ක හතරක් ආවරණය කරමින් විශේෂයෙන් යුද ගැටුම් හේතුවෙන් දැඩි පීඩාවට පත් වූ ප්‍රදේශ ආවරණය කරමින් ආරම්භ කරනු ලැබූ මෙම වැඩසටහන 2004 වර්ෂයේ සුනාමි ව්‍යසනයෙන් පසු දිස්ත්‍රික්ක හයක් දක්වා ව්‍යාප්ත කෙරුණා.

අමාත්‍යාංශ සහ සංවිධාන කිහිපයක සහාය ඇතිව මෙම වැඩසටහන තවදුරටත් ශක්තිමත් කිරීමට ලැබීම පිළිබඳ සතුටු වෙනවා. කොවිඩ් (COVID-19) වසංගතයත් සමඟ රටේ ආර්ථිකය පෙර නොවූ විරූ ආකාරයේ පසුබෑමකට ලක් වුණා. එහි ප්‍රතිඵලයක් ලෙස ශ්‍රී ලංකාවේ දරිද්‍රතා මට්ටම් සැලකිය යුතු ලෙස ඉහළ ගියා. නමුත් ජනාධිපති රනිල් වික්‍රමසිංහ මහතාගේ නායකත්වය යටතේ අද රටේ ආර්ථිකය නැවත ස්ථාවර මට්ටමකට පැමිණ තිබෙන අතර ජනතාවගේ දිළිඳුකම පිටුදැකීම සඳහා ද විශේෂ අවධානයකින් කටයුතු කරනවා.

දරිද්‍රතාව පිටුදැකීම සහ ජනතාවගේ පෝෂණ තත්ත්වය ඉහළ නැංවීම සඳහා කාලයෙන් කාලයට අපේ රට තුළ විවිධ වැඩසටහන් ක්‍රියාත්මක කෙරුණා. සමෘද්ධි වැඩසටහන එහි ප්‍රධාන තැනක් ගත් අතර වත්මන් රජය ආරම්භ කළ අස්වැසුම වැඩසටහන හරහා එය තවදුරටත් පුළුල් කෙරුණා.

කිසිසේත්ම දේශපාලනීකරණයට ලක් නොවෙමින් දත්ත මත පදනම්වූ, විනිවිද බවකින් යුතු ආකෘතියකට අනුව අස්වැසුම වැඩසටහන ක්‍රියාත්මක වීම විශේෂත්වයක් බව කිවයුතුයි. ජනතාවට අභියාචනා ඉදිරිපත් කිරීමට හා විරෝධතා දැක්වීමට ඉඩ සලසමින් දත්ත මත පදනම් වූ සමීක්ෂණ සහ ගණනය කිරීම් මත සකසන අවසන් ලැයිස්තුවට අනුව අදාළ මුදල් සෘජුවම ප්‍රතිලාභීන්ගේ බැංකු ගිණුම්වලට යොමු කෙරෙනවා. අස්වැසුම මෙරට දිළිඳුකම පිටුදැකීම වෙනුවෙන් ශක්තිමත් දායකත්වයක් සපයනු ඇතැයි අප විශ්වාස කරනවා.

එසේම අප රටක් ලෙස තිරසර ආර්ථික වර්ධනයක් උදාකරගත යුතුයි. ඒ වෙනුවෙන් සංචාරක, කෘෂිකාර්මික සහ නිෂ්පාදන ක්‍රියාවලියේ ඉහළ වර්ධනයක් ඇති කර ගැනීම වෙනුවෙන් රජය සැලසුම්සහගතව කටයුතු කරනවා. ඉහළ පිරිවැයක් දරන සංචාරකයන් මෙරටට ආකර්ෂනය කර ගැනීම, කෘෂිකර්මාන්තය නවීකරණය සහ ශ්‍රී ලංකාව නිෂ්පාදන කේන්ද්‍රස්ථානයක් ලෙස ගොඩනැඟීම කෙරෙහි එහිදී අවධානය යොමුව තිබෙනවා.

අභියෝග මධ්‍යයේ වුවද ශ්‍රී ලංකාව අද ආර්ථික ස්ථාවරත්වයක් අත්කරගෙන සිටිනවා. ජීවන වියදම සැලකිය යුතු ලෙස ඉහළ යාම වැනි අභියෝගවලට මුහුණ දී සිටියදී වුවද රටට නව ආදායම් මාර්ග උත්පාදනය කර ගැනීමේ සහ ආර්ථිකය වර්ධනය කර ගැනීම වෙනුවෙන් රජය සක්‍රියව කටයුතු කරනවා. රටට ආදායම් උත්පාදනය කර ගැනීමේ දී සංචාරක කර්මාන්තය ප්‍රමුඛ ක්ෂේත්‍රයක් වන අතර මෙරටට පැමිණෙන සංචාරකයන් සංඛ්‍යාව දෙගුණයකින් ඉහළ නංවා ගැනීමට පමණක් නොව සංචාරකයන්ගේ පහසුකම් ගුණාත්මක ලෙස ඉහළ නැංවීම මඟින් දෛනිකව වැඩි මුදලක් වියදම් කරන ඉහළ පෙළේ සංචාරකයන් මෙරටට ගෙන්වා ගැනීමට රජය සැලසුම්සහගතව කටයුතු කරමින් සිටිනවා.

මීට පෙර පැවති පොහොර ප්‍රතිපත්තිය හේතුවෙන් බලපෑමට ලක් වූ මෙරට කෘෂිකාර්මික අංශයේ නවීකරණය වෙනුවෙන් මේ වන විට පුළුල් වැඩසටහනක් ක්‍රියාත්මක කර තිබෙනවා. මීට අමතරව, තායිලන්තය සමඟ නිදහස් වෙළෙඳ ගිවිසුමක් අස්සන් කිරීම වැනි වෙළෙඳ ගිවිසුම් සඳහා උපායමාර්ගික හවුල්කාරිත්වයන් සහ සංශෝධන හරහා නිෂ්පාදන දියුණු කරලීමටද අපේක්ෂා කරනවා.

පුනර්ජනනීය බලශක්තිය සඳහා ශ්‍රී ලංකාව සතු මෙගාවොට් 18,000ක් පමණ වන විභවයත් සමඟ මෙරට ආර්ථිකයේ සුවිශේෂී ස්ථානයක් සනිටුහන් වනු ඇති. ආර්ථික ප්‍රතිසංස්කරණ වැඩසටහන් අඛණ්ඩව ක්‍රියාත්මක කිරීම මඟින් ආයෝජකයන් සඳහා සුදුසු පරිසරයක් ඇති කර ආයෝජකයන් වැඩි වශයෙන් මෙරටට ආකර්ෂනය කර ගැනීමට කටයුතු කරනවා. මෙරට ආර්ථිකය ගොඩනගමින් ජන ජීවිතය යහපත් කිරීම වෙනුවෙන් මෙන්ම දේශපාලන අභියෝගවලට ද විසඳුම් සෙවීමට ජනාධිපතිතුමා ප්‍රමුඛ වත්මන් රජය කැපවී සිටින බව ද කිව යුතුයි.

කර්මාන්ත සහ සෞඛ්‍ය අමාත්‍ය වෛද්‍ය රමේෂ් පතිරණ, කෘෂිකර්ම සහ වැවිලි කර්මාන්ත අමාත්‍ය මහින්ද අමරවීර, ලෝක ආහාර වැඩසටහනේ මෙරට නියෝජිත අබ්දුර් රහීම් සිද්දික්, පාත් (PATH) සංවිධානයේ ඉන්දියානු නේවාසික අධ්‍යක්ෂ නීරාජ් ජෛන් (Neeraj Jain), ජාතික ආහාර ප්‍රවර්ධන මණ්ඩලයේ සභාපති පාලින්ද සාගර, බිල් සහ මෙලින්ඩා ගේට්ස් පදනමේ ගෝලීය සංවර්ධන අංශයේ ඉන්දියානු නේවාසික කාර්යාලයේ පෝෂණ ප්‍රධානී රුචිකා සක්දේවා, බිල් සහ මෙලින්ඩා ගේට්ස් පදනමේ Connect to Care වැඩසටහනේ ශ්‍රී ලංකාවේ ප්‍රධානී චන්දිත සමරනායක යන මහත්ම මහත්මීන් ද ඩිමෝ සමාගම, ලෝක සෞඛ්‍ය සංවිධානය, යුන්සෙෆ් සංවිධානය (UNICEF), ජාත්‍යන්තර සංවර්ධනය පිළිබඳ එක්සත් ජනපද නියෝජිතායතනය (USAID), ලෝක බැංකුව, ශ්‍රී ලංකාවේ කැනේඩියානු මහකොමසාරිස් කාර්යාලය, ශ්‍රී ලංකා ප්‍රමිති ආයතනය සහ ඩීෆැට් ආයතනය (DFAT) යන ආයතනයන්හි නියෝජිතයන් පිරිසක් ද මෙම අවස්ථාවට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.