Published on: ජනවාරි 17, 2024

දරුවන්ගේ ජීවිත ජයග්‍රහණය කරවිය හැකි එකම මාර්ගය අධ්‍යාපනයයි -ජනාධිපති ලේකම් සමන් ඒකනායක මහතා

දරුවන්ගේ ජීවිත ජයග්‍රහණය කිරීමට තිබෙන එකම මාර්ගය අධ්‍යාපනය බව ජනාධිපති ලේකම් සමන් ඒකනායක මහතා අවධාරණය කළේය.

අධ්‍යාපන කටයුතු සාර්ථකව නිම කිරීම තුළින් දැනුම්වත් පුරවැසියකු රටට බිහිවන බවත් එය රටේ සාර්ථකත්වයට සෘජුව බලපාන බවත් ජනාධිපති ලේකම්වරයා පෙන්වා දුන්නේය.

ජනාධිපති ලේකම් සමන් ඒකනායක මහතා මේ බව සඳහන් කර සිටියේ නවගත්තේගම කෝන්කඩවල විද්‍යාලයට අංග සම්පූර්ණ පුස්තකාලයක් ලබාදීම වෙනුවෙන් පසුගිය (15)දා පැවති උත්සවයට එක්වෙමිනි.

චීන මූල්‍යාධාර යටතේ ජනාධිපති ලේකම් සමන් ඒකනායක මහතාගේ මඟපෙන්වීම අනුව ජනාධිපති කාර්යාලයේ මැදිහත්වීමෙන් නවගත්තේගම කෝන්කඩවල විද්‍යාලයට හා මීගමුව දූව කනිෂ්ඨ විද්‍යාලයට අංග සම්පූර්ණ පුස්තකාල දෙකක් ලබාදීමට කටයුතු කෙරිණි.

එක් පුස්තකාලයක් සඳහා වැය කර ඇති මුදල රුපියල් මිලියන දෙකක් වන අතර 6 ශ්‍රේණියේ සිට 11 ශ්‍රේණිය දක්වා දරුවන්ට අධ්‍යාපන කටයුතු සඳහා අවශ්‍ය පොත්පත් රාශියක් මෙම පුස්තකාලවලට ඇතුළත්ය.

ආර්ථික දුෂ්කරතා මධ්‍යයේ සිය අධ්‍යාපන කටයුතු සිදු කරනු ලබන ග්‍රාමීය සිසු දරුවන්ට අත්වැලක් වෙමින් දැනුමෙන් පෝෂිත අනාගත පරපුරක් බිහි කිරීම මඟින් රටේ ඉදිරි අනාගතය සාර්ථකත්වය කරා ගෙන යාම මෙම වැඩසටහනේ මූලික අරමුණයි.

මෙහිදී අදහස් දැක්වූ ජනාධිපති ලේකම් සමන් ඒකනායක මහතා මෙසේද පැවසීය.

පසුගිය වසරේ දෙසැම්බර් මාසයේදී ශ්‍රී ලංකාවේ චීන නියෝජ්‍ය තානාපතිවරයා රුපියල් මිලියන හතරක ව්‍යාපෘතියක් සඳහා ආධාර කිරීමට හැකියාව තිබෙන බව මා සමඟ පැවසුවා. එහිදී පාසල් දෙකක් තෝරා ගෙන ඊට පුස්තකාල දෙකක් ලබාදීමට මා කල්පනා කළා.

මෙම පාසල්වලට පුස්තකාල ලබාදීමට කල්පනා කළේ විශේෂ හේතුවක් ඇතිවයි. ඉදිරි අවුරුදු දහය තුළ මෙම පාසල්වලට පැමිණෙන දුවා දරුවන්ට මෙම පුස්තකාල හොඳින් භාවිතා කළ හැකියි. මමත් ප්‍රාථමික අධ්‍යාපනය ලැබුවේ මෙවැනි කුඩා පාසලකයි. ඒ නිසා මේ දරුවන්ගේ අනාගතය දැන්ම කියන්න නොහැකිවුවත් ඔවුන්ගේ ජීවිතය ඉදිරියට ගෙන යාමට අවශ්‍ය සහයෝගය ලබාදීම අප කළ යුතුයි.

මට දැනගන්න ලැබුණු පරිදි අද මෙහි සිටින චීන නියෝජ්‍ය තානාපතිතුමාගේ පියා ගොවියෙක්. චීන නියෝජ්‍ය තානාපතිවරයා 8 ශ්‍රේණියේ ඉගෙණුම ලබන විට ගොයම් සිටුවීමට පැමිණෙන ලෙස පියා ඔහුට කියා තිබෙනවා .

පැයක් පමණ ගොයම් සිටුවීමේදී එතුමාගේ කොන්දේ විශාල වේදනාවක් ඇතිව තිබෙනවා. කොන්ද වේදනාව පියාට පැවසූ විට ” ඔබ හොඳට ඉගෙන ගත්තේ නැතිනම් කරන්න වෙන්නේ මේ රැකියාව “බව පියා පවසා තිබෙනවා.

ඒ පාඩම හිතට ගත් එතුමා අද නියෝජ්‍ය තානාපතිවරයෙක් දක්වා සාර්ථකව ඉදිරියට පැමිණ තිබෙනවා. ජාත්‍යන්තර වශයෙන් රට රටවල් වල සේවය කරන මට්ටමට පැමිණ තිබෙනවා. ඒනිසා මේ දරුවන් හිතට ගන්න ඕන ජීවිතය ජයග්‍රහණය කිරීමට තිබෙන එකම මාර්ගය අධ්‍යාපනය බව. අධ්‍යාපනයෙන් තොරව දරුවන්ට හෝ රටකට අනාගතයක් නොමැති බව පිළිගත යුතුයි.

රාජ්‍ය අමාත්‍ය අරුන්දික ප්‍රනාන්දු, පාර්ලිමේන්තු මන්ත්‍රී කාවින්ද ජයවර්ධන, ශ්‍රී ලංකාවේ චීන නියෝජ්‍ය තානාපති යන්වෙයි ෂු මහතා ( YANWAI ZHU) සහ අධ්‍යාපන අමාත්‍යංශයේ නිලධාරීන් පිරිසක්ද විදුහල්පතිවරු, ආචාර්ය මණ්ඩලය, දෙමාපියන් ඇතුළු සිසු දරුවන් පිරිසක් මෙම අවස්ථාවට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.