Published on: පෙබරවාරි 4, 2024

තායිලන්ත අගමැති ඇතුළු දූත පිරිස ජනාධිපති මන්දිරයේ දී ජනපති සමඟ සුහද හමුවක

මෙරටට පැමිණ සිටින තායිලන්ත අගමැති ශ්‍රෙත්ථා තවීසින් මහතා ඇතුළු දූත පිරිස ඊයේ (03) රාත්‍රියේ කොටුව ජනාධිපති මන්දිරයේ දී ජනාධිපති රනිල් වික්‍රමසිංහ මහතා සමඟ සුහද හමුවකට එක් විය.

ජනාධිපති මන්දිරය වෙත පැමිණි තායිලන්ත අග්‍රමාත්‍යවරයා අතුළු දූත පිරිස අග්‍රාමාත්‍ය දිනේෂ් ගුණවර්ධන මහතා විසින් පිළිගනු ලැබීය.

අනතුරුව ජනාධිපති රනිල් වික්‍රමසිංහ මහතා පිරිස ජනාධිපති මන්දිරය වෙත කැඳවාගෙන යනු ලැබූ අතර ඉන් අනතුරුව දෙපාර්ශ්වය සුහද කථා බහකට එක් වූහ.

මේ අතර ජනාධිපති මන්දිරයේ ඇති පැරණි සිතුවම් ද නැරඹූ තායිලන්ත අග්‍රාමාත්‍යවරයා එහි තැන්පත් කර තිබූ විශේෂ අමුත්තන්ගේ පොතේ සමරු සටහනක් ද තැබීය.

තායිලන්ත නියෝජ්‍ය අග්‍රාමාත්‍ය සහ එරට වාණිජ අමාත්‍ය ෆුම්තාම් වෙචයචායි මහතා ඇතුළු දූත පිරිස සහ ශ්‍රී ලංකාව නියෝජනය කරමින් තායිලන්ත අග්‍රාමාත්‍යවරයාගේ පරිවාර අමාත්‍යවරයා ලෙස කටයුතු කළ අමාත්‍ය වෛද්‍ය රමේෂ් පතිරණ, නිමල් සිරිපාල ද සිල්වා, ජනාධිපති නීතිඥ විජයදාස රාජපක්ෂ, කංචන විජේසේකර, ජීවන් තොණ්ඩමන්, රාජ්‍ය අමාත්‍ය තාරක බාලසූරිය, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, අග්‍රාමාත්‍ය ලේකම් අනුර දිසානායක, විදේශ කටයුතු අමාත්‍යාංශයේ ලේකම් අරුණි විජේවර්ධන යන මහත්ම මහත්මීහු ඇතුළු පිරිසක් මෙම අවස්ථාවට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.