Published on: දෙසැම්බර් 19, 2023

ඩයස්පෝරාව නියෝජනය කළ පමණින් අන්තවාදියෙකු හෝ ශ්‍රී ලාංකික විරුද්ධවාදියකු වන්නේ නැහැ

-ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක මහතා

ඩයස්පෝරාව නියෝජනය කළ පමණින් යමෙකු අන්තවාදියෙකු හෝ ශ්‍රී ලාංකික විරුද්ධවාදියකු නොවන බව ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක මහතා පැවසීය.

ඩයස්පෝරාව මෙරට සංවර්ධන ක්‍රියාලිය සඳහා සම්බන්ධ කර ගනිමින් ඔවුන්ගේ ප්‍රතිලාභ මෙන්ම ආයෝජන දිරිමත් කරන පරිසරයක් නිර්මාණය කළ යුතු බවත් එම ආයෝජන සඳහා ශ්‍රී ලංකාව ආකර්ශනීය ස්ථානයක් බවට පත් කිරීමට නම් විනිවිදභාවයෙන් කටයුතු කළ යුතු බවත් ඒ මහතා අවධාරණය කළේය.

සාගල රත්නායක මහතා මේ බව සඳහන් කළේ ඊයේ (18) ජනාධිපති කාර්යාලයේ පැවති ජාත්‍යන්තර සංක්‍රමණික දින සැමරුම් උත්සවය අමතමිනි.
විදේශගත ශ්‍රී ලාංකික කටයුතු පිළිබඳ කාර්යාලයේ https://oosla.lk/ නිල වෙබ් අඩවිය දියත් කිරීමද මෙහිදී සාගල රත්නායක මහතා අතින් සිදු කෙරිණි.
මෙහි ප්‍රධාන දේශනය මහාචාර්ය ලක්ෂ්මන් සමරනායක මහතා විසින් සිදු කරනු ලැබූ අතර විදේශගත ශ්‍රී ලාංකික කටයුතු පිළිබඳ කාර්යාලය හා එක්ව ලබා දෙන සේවාව අගයමින් සාගල රත්නායක මහතා සහ විදේශ කටයුතු අමාත්‍ය අලි සබ්‍රි මහතා විසින් ඒ මහතා වෙත සමරු තිළිණයක් ද ප්‍රදානය ක‍ළහ.

මෙහිදී වැඩිදුරටත් අදහස් දැක්වූ සාගල රත්නායක මහතා මෙසේද පැවසීය.
ජාති ආගම් භේදයකින් තොරව වෙනත් රටක ජීවත්වන ඕනෑම ශ්‍රී ලාංකිකයෙකු ඩයස්පෝරාවේ පාර්ශ්වකරුවෙකු වෙනවා. ශ්‍රී ලංකාව සහ එහි ජනතාව අතර, විශේෂයෙන් විදේශගතව සිටින ප්‍රජාව අතර දුරස්ථභාවයක් ඇති කළේ පසුගිය කාලවකවානුවේ ශ්‍රී ලංකාවේ සිදු වූ අමිහිරි සිදුවීම් බව කිව යුතුයි. රටේ සංවර්ධනයට දායක වීමට කැමති නමුත් නිලධාරිවාදී බාධාවන් මෙන්ම ඩයස්පෝරාවේ සිටින අය මුහුණ දෙන අභියෝග පිළිබඳ අප අවධානය යොමු කළ යුතු වෙනවා.

ශ්‍රී ලංකාවේ සිදු කෙරෙන පුළුල් ආර්ථික ප්‍රතිසංස්කරණ ක්‍රියාවලියට සමගාමීව ස්ථාපිත කරන ලද විදේශගත ශ්‍රී ලාංකික කටයුතු පිළිබඳ කාර්යාලයේ ( OOSLA) මූලික අරමුණ වන්නේ සමස්ත ශ්‍රී ලාංකික ඩයස්පෝරාව සමඟ සම්බන්ධ වන පුළුල් වේදිකාවක් නිර්මාණය කිරීමයි.

ද්විත්ව පුරවැසිභාවය, විදේශ ගමන් බලපත්‍ර අලුත් කිරීම සහ ඔවුන්ගේ සබඳතා පිළිබඳ තොරතුරු ලබා ගැනීම වැනි ගැටළු සම්බන්ධයෙන් විදේශගත ශ්‍රී ලාංකිකයින්ට සහාය වීම මෙම කාර්යාලයේ ප්‍රධාන අරමුණු වෙනවා. මෙහි ඉලක්කය වන්නේ රටේ සංවර්ධනයට දායක වීම සඳහා සියලුම ශ්‍රී ලාංකිකයන් ඒකරාශී කර ගැනීමයි.

රට තුළ ආයෝජනය කිරීම සඳහා විදේශයන්හි වෙසෙන ශ්‍රී ලාංකිකයින් ආකර්ෂණය කර ගැනීමට නම් විනිවිදභාවයකින් යුත් ආකර්ෂණීය පොදු වේදිකාවක අවශ්‍යතාව මෙහිදී අප හඳුනා ගනු ලැබුවා.
ජනතාව මුහුණ දෙන ආර්ථික අභියෝග 2024 අවසන් වන විට හෝ 2025 මුල් භාගය වන විට පහව ගොස් රට ශීඝ්‍ර සංවර්ධනයකට අවතීර්ණ වන බව අපගේ විශ්වාසයි. ඒ සඳහා රජය ගෙන යන වැඩපිළිවෙල අවබෝධ කර ගනිමින් සියලුදෙනා ඊට සහාය ලබා දුනහොත් මේ කාර්යය කිසි සේත්ම අපහසු වන්නේ නැහැ. එහිදී රජය සහ ජනතාව අතර නිවැරදි සන්නිවේදනයක් පවත්වාගෙන යාම වඩාත් වැදගත් වෙනවා.

මෙහිදී අදහස් දැක්වූ විදේශ කටයුතු අමාත්‍ය අලි සබ්‍රි මහතා සඳහන කළේ සංවර්ධනය කරා යන ගමනේදී ඩයස්පෝරාව සමඟ ක්‍රියාකාරීව කටයුතු කිරීම අත්‍යාවශ්‍ය බවයි.
සංක්‍රමණය වූවන් මුහුණ දෙන අභියෝග පිළිබඳව අදහස් පළ කළ අමාත්‍යවරයා ඔවුන්ට නැවත සිය මව්බිමට පැමිණීමට අවශ්‍යය පරිසරය නිර්මාණය කළ යුතු බව ද සඳහන් කළේය. රටේ ආණ්ඩුක්‍රම ව්‍යවස්ථාවේ දක්වා ඇති මූලධර්මවලට අනුකූලව ඔවුන්ට ගෞරවය, අභිමානය සහ අයිතිවාසිකම පිළිබඳ හැඟීමක් ලබා දීම වැදගත් බවත් ඒ සඳහා සාධනීය පියවරක් ලෙස වන්දි ලබා දීම, අතුරුදහන් වූවන් සොයා ගැනීම සහ නඩු පැවරීමේ හැකියාව ඇතුළු සැලකිය යුතු බලතල සහිත සත්‍ය හා ප්‍රතිසන්ධාන කොමිසමක් පිහිටුවීමේ නව නීතියක් ගෙන එන බවත් විදේශ කටයුතු අමාත්‍ය අලි සබ්‍රි මහතා වැඩිදුරටත් සඳහන් කළේය.

මෙහිදී අදහස් දක්වමින් විදේශගත ශ්‍රී ලාංකික කටයුතු පිළිබඳ කාර්යාලයේ අධ්‍යක්ෂ ජනරාල් වී. ක්‍රිෂ්ණමූර්ති මහතා සඳහන් කළේ ජනාධිපති රනිල් වික්‍රමසිංහ මහතාගේ සංකල්පයකට අනුව විදෙස්ගත ශ්‍රී ලාංකිකයින්ගේ කටයුතු පිළිබඳ කාර්යාලය 2023 ජනවාරි මාසයේ වැඩ කටයුතු ආරම්භ කරන ලද බවත් එම ආයතනය ලෝකවාසී ශ්‍රී ලාංකික ප්‍රජාව වෙත ගෙන යාමට දෙසැම්බර් 18 වනදා සුදුසුම දිනය වන බවත්ය.

විවිධ හේතු මත විදෙස් ගත වූ ශ්‍රී ලාංකිකයන් සංඛ්‍යාව මිලියන 03කට ආසන්න බව සඳහන් කළ ඒ මහතා මෙරට ආර්ථිකයට එම ජනතාවගේ දායකත්වය කොතරම්ද යන්න පසුගිය කාල සීමාවේදී අත්විඳීමට ලැබුණු බවද පැවසීය.
විදේශ රටවල් නියෝජනය කරන තානාපතිවරුන්, මහ කොමසාරිස්වරුන්, අමාත්‍යාංශ ලේකම්වරුන් ඇතුළු පිරිසක් මෙම අවස්ථාවට සහභාගි වූ අතර විදේශ ගත ශ්‍රී ලාංකිකයින් විශාල සංඛ්‍යාවක් මාර්ගගත තාක්ෂණය ඔස්සේ මීට සම්බන්ධ වූහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.