Published on: ජූලි 2, 2024

ආර්. සම්බන්ධන් මහතා සෑම විටම ශ්‍රී ලංකාවේ භෞමික අඛණ්ඩතාව වෙනුවෙන් නොසැලී පෙනී සිටියා

  • ආර්. සම්බන්ධන් මහතාගේ අභාවය පිළිබඳ ශෝකය පළ කරමින් ජනපති පාර්ලිමේන්තුවේ දී කියයි.

දෙමළ ජාතික සන්ධානයේ නායක, අභාවප්‍රාප්ත පාර්ලිමේන්තු මන්ත්‍රී ආර්. සම්බන්ධන් මහතා සෑම අවස්ථාවකම ශ්‍රී ලංකාවේ භෞමික අඛණ්ඩතාව වෙනුවෙන් පෙනී සිටි බවත්, බලය බෙදිය යුතු ආකාරය පිළිබඳ ඔහුට ඔහුගේම වූ මතයක් තිබූ බවත් ජනාධිපති රනිල් වික්‍රමසිංහ මහතා පැවසීය.

ඒ වෙනුවෙන් ඔහු ප්‍රමාණවත් වැඩ කොටසක් ඉටුකළ බව පෙන්වා දුන් ජනාධිපතිවරයා ආර්. සම්බන්ධන් මහතා වෙනුවෙන් අපට කළ හැකි ඉහළම කර්යය වන්නේ ඒ වෙනුවෙන් වු වැඩකටයුතු සාර්ථකව අවසන් කිරීම බවද සඳහන් කළේය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ ආර්. සම්බන්ධන් මහතාගේ හදිසි අභාවය පිළිබඳ සිය ශෝකය පළ කරමින් පාර්ලිමේන්තුවේ අද (02) විශේෂ ප්‍රකාශයක් සිදු කරමිනි.

මෙහිදී වැඩිදුරටත් අදහස් දැක්වූ ජනාධිපතිවරයා මෙසේද පැවසීය,

ගරු කථානායකතුමනි, මම මේ කතාව සිදු කරන අවස්ථාව වන විට එදා මා සමඟ පාර්ලිමේන්තුවට පැමිණි අයගෙන් ඉතිරිව සිටි සගයෙකු වන සම්බන්ධන් මන්ත්‍රීතුමා තවදුරටත් අප අතර නැහැ.

ඉතා දුෂ්කර කාලපරිච්ඡේදයන් තුළ එතුමා සමඟ එකට වැඩ කිරීමට මට අවස්ථාව ලැබුණු අතර ඔහු එහිදී ලබා දුන් දායකත්වය මම කෘතවේදීව සිහිපත් කරනවා. එතුමා දෙමළ එක්සත් විමුක්ති පෙරමුණ (TULF) සහ දෙමළ ජාතික සන්ධානය (TNA) නියෝජනය කළ ද සෑම විටම ශ්‍රී ලංකාවේ භෞමික අඛණ්ඩතාව වෙනුවෙන් නොසැලී පෙනී සිටියා.

වරෙක ඔහු මා සමඟ මෙසේ ප්‍රකාශ කළා. “රනිල් මම රට බෙදනවා කියලා ඔබ හිතනවද? මම කුඩා දරුවෙක් විදියට 1948 දී රටට නිදහස ලැබෙනවා බලන්න ගියා.” කියලා.

අපි කවුරුවත් ඒ අවස්ථාව දැක නැහැ. අප අතරින් බොහෝ දෙනෙකු ඒ වන විට ඉපදිලාවත් නෑ. ඒත් බලය බෙදිය යුතු ආකාරය ගැන ඔහුට ඔහුගේම මතයක් තිබුණා. ඒ ගැන විවාද කරන්න කිසිම හේතුවක් නැහැ වගේම මම සිතන ආකාරයට ඒ පිළිබඳ ඔහු ප්‍රමාණවත් තරම් වැඩ කොටසක් සිදු කර තිබෙනවා. ඒ පිළිබඳ වැඩකටයුතු වලින් අපට තව සුළු ප්‍රමාණයක් අවසන් කිරීමට තිබෙනවා. ඒ වගේම ඔහු වෙනුවෙන් කළ හැකි ඉහළම කාර්යය වන්නේ එම වැඩකටයතු අවසන් කිරීම බව ද කිවයුතුයි.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.