Published on: මාර්තු 6, 2024

ආර්ථික තත්ත්වය යහපත් බැවින් අත්‍යාවශ්‍යම සංවර්ධන කටයුතු ආරම්භ කර තිබෙනවා – නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු

රජය විසින් අත්‍යාවශ්‍යම සංවර්ධන කටයුතු මේ වන විට ආරම්භ කර තිබෙන බව නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු මහතා පැවසීය.

ඉන්දියාව, චීනය සහ බටහිර රටවල් කිහිපයක් මෙරට ආයෝජන සඳහා ඉදිරිපත් වී සිටින බව ද රාජ්‍ය අමාත්‍යවරයා සඳහන් කළේය.

නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (06) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක් වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය,

ආර්ථික අර්බුදය හේතුවෙන් පසුගිය සමයේ සංවර්ධන ව්‍යාපෘති කිසිවක් ක්‍රියාත්මක වුණේ නැහැ. නමුත් මේ වන විට ආර්ථික තත්ත්වය යහපත් අතට හැරෙමින් තිබෙන නිසා අත්‍යාවශ්‍යම සංවර්ධන කටයුතු රජය ක්‍රියාත්මක කර තිබෙනවා.

චීන ආධාර යටතේ සිදු කෙරෙන කොළඹ සහ තදාසන්න ප්‍රදේශවල නිවාස 2000 ව්‍යාපෘතිය ආරම්භ කිරීමට කටයුතු අප කළා. මහල් නිවාසවල ජීවත් වන සියලුම දෙනාට ඔප්පු ලබා දීමට ද සැලසුම් කර තිබෙනවා.

ඒ වගේම “කඳුකර දශකය” සංවර්ධන ව්‍යාපෘතියේ වැඩකටයුතු ද මේ වන විට ආරම්භ කර තිබෙනවා. ඒ යටතේ දිවයින පුරා ග්‍රාමීය මට්ටමේ සංවර්ධන ව්‍යාපෘති රැසක් දියත් කිරීමට නියමිතයි. එමෙන්ම වෙරළ සංවර්ධනය සහ පහත් බිම් සංවර්ධන කටයුතු ද ආරම්භ කර තිබෙනවා.

රජය ව්‍යාපාර කටයුතුවලින් ඉවත්වීමේ ප්‍රතිපත්තිය යටතේ කොළඹ හිල්ටන් හෝටලය පෞද්ගලික අංශයේ ආයෝජනයකට ලබාදීම සඳහා සූදානම් කර තිබුණා. ඒ අනුව එම ආයෝජනයට මේ විටත් ව්‍යාපාරිකයන් සිව් දෙනෙකු ඉදිරිපත් වී සිටිනවා. නමුත් රජය බලාපොරොත්තු වන මූල්‍ය ආයෝජනය එහිදී අනිවාර්යෙන් ලැබිය යුතුයි.ඒ වගේම අප අමාත්‍යාංශය යටතේ තිබෙන හයට් හෝටලයේ වැඩ කටයුතු මේ වන විට 50%ක් අවසන් කර තිබෙනවා.

ඒ සඳහා ද ආයෝජකයෙකු සොයමින් සිටිනවා. ලෝටස් කුළුණ සිට ලේක්හවුස් වටරවුම දක්වා ඩී.ආර් විජේවර්ධන මාවතේ දෙපස සංවර්ධනය කිරීමට ආයෝකයින් සඳහා ඉදිරිපත් කර තිබෙනවා.

තවද කොළඹ බේරේ වැව පවිත්‍ර කිරීමේ ජපන් ව්‍යාපෘතියේ මූලික වැඩ කටයුතු ද මේ වන විට අවසන් කර තිබෙනවා. එම ව්‍යාපෘතිය ලබන මාසයේ දී ආරම්භ කිරීමට හැකි බව ද සඳහන් කළ යුතුයි.

සුළු වර්ෂාවකට පවා යට වෙන කොළඹ නගරයේ ගංවතුර පාලනය කිරීමට අප අමාත්‍යාංශය මඟින් විධිමත් වැඩපිළිවෙළක් සකස් කර තිබෙනවා. නමුත් මූල්‍ය ප්‍රතිපාදන වෙන් කෙරෙන ආකාරයට එහි ඉදිරි වැඩ කටයුතු අවසන් කිරීමට අප සූදානමින් සිටිනවා.

ඒ වගේම ඉන්දියාව, චීනය සහ බටහිර රටවල් කිහිපයක් මෙරට ආයෝජන සඳහා ඉදිරිපත් වී සිටින බව ද කිව යුතුයි. මේ වන විට රටේ ආර්ථිකය යහපත් අතට හැරෙමින් තිබෙන බැවින් ආයෝජකයන් මෙරටට ආකර්ශනය වනු ඇති බවට විශ්වාස කරනවා.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.