Published on: මාර්තු 20, 2024

අස්වැසුමලාභීන් 14,000ක් සවිබලගැන්වීම සඳහා විශේෂ වැඩ සටහනක් – සමාජ සවිබලගැන්වීම් රාජ්‍ය අමාත්‍ය අනුප පස්කුවල්

කුඩා තේ වතු සංවර්ධන අධිකාරිය සමඟ එක්ව අස්වැසුමලාභීන් 14,000ක් සවිබලගැන්වීම සඳහා වන විශේෂ වැඩසටහනක් ඉදිරියේ දී ක්‍රියාත්මක කරන බව සමාජ සවිබලගැන්වීම් රාජ්‍ය අමාත්‍ය අනුප පස්කුවල් මහතා පැවසීය.

පශු සම්පත් අමාත්‍යාංශය හරහා කළුතර සහ කුරුණෑගල දිස්ත්‍රික් කේන්ද්‍ර කරගනිමින් ගම් කුකුළු ගොවිපොළ ව්‍යාපෘති 10,000ක් ආරම්භ කිරීමට බලාපොරොත්තු වන බව ද රාජ්‍ය අමාත්‍යවරයා සඳහන් කළේය.

සමාජ සවිබලගැන්වීම් රාජ්‍ය අමාත්‍ය අනුප පස්කුවල් මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (20) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

හිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය,

ජනාධිපති රනිල් වික්‍රමසිංහ මහතාගේ මඟ පෙන්වීම ඔස්සේ ක්‍රියාත්මක වන “අස්වැසුම වැඩසටහන” සඳහා සමෘද්ධිය සහනාධාරය සඳහා වෙන් කළ මුදල මෙන් තුන් ගුණයක මූල්‍ය ප්‍රතිපාදන වෙන් කර තිබෙනවා. සමෘද්ධිය සඳහා වෙන් කර තිබුණේ රුපියල් බිලියන 60ක් වුවත් අස්වඇසුම සඳහා රුපියල් බිලියන 180ක් වෙන් කර තිබෙනවා. පසුගිය සමයේ සිදුවූ ආර්ථික අර්බුදයෙන් වැඩි වශයෙන්ම දුෂ්කරතාවට ලක්වූ ජනතාව වෙත එම සහනාධාර ලබා දීම සිදු වනවා.

ඒ වගේම ආර්ථික දුෂ්කරතාවයෙන් පෙළෙන ජනතාව තව දුරටත් සවිබලගැන්වීම සඳහා ලෝක බැංකුව, ආසියානු සංවර්ධන බැංකුව සහ මහා භාණ්ඩාගාරය එක්ව මූල්‍ය ප්‍රතිපාදන ලබා දී තිබෙනවා. ඒ යටතේ සියළුම ග්‍රාම සේවා වසම් ආවරණය වන ආකාරයට එක් ග්‍රාමසේවා වසමකින් 07 දෙනෙකු බැගින් තෝරාගෙන NAITA (National Apprentice and Industrial Training Authority) සහ වෘත්තීය පුහුණු අධිකාරිය (Vocational Training Authority) ඒකාබද්ධව වෘත්තීය පුහුණුව ලබාදීමේ වැඩසටහනක් ද ආරම්භ කර තිබෙනවා. එහිදී සාර්ථක ලෙස පුහුණුව නිම කරන පිරිසට පිළිගත් වෘත්තීය පුහුණු සහතිකයක් ලබා දෙනවා.

එමෙන්ම කුඩා තේ වතු සංවර්ධන අධිකාරිය සමඟ එක්ව අස්වැසුමලාභීන් 14,000ක් සවිබලගැන්වීම සඳහා වන විශේෂ වැඩසටහනක් ඉදිරියේ දී ක්‍රියාත්මක කරනවා. එහිදී තේ හෙක්ටයාර 2000ක් වගා කිරීමට නියමිතයි.

තවද ධීවර කර්මාන්තය සඳහා විශේෂ ණය සහන ක්‍රමවේදයක් ආරම්භ කර තිබෙනවා. ඒ යටතේ ධීවර අමාත්‍යංශය, ප්‍රජාමූල සංවිධාන සහ සමෘද්ධි බැංකු සමඟ එක්ව කරදිය – මිරිදිය ධීවර පවුල් සවිබලගැන්වීම සඳහා අවශ්‍ය සහන ණය ප්‍රතිපාදන ලබා දීමට කටයුතු කරනවා. එසේම මුහුදු කූඩැල්ලන් නිෂ්පාදනය සඳහා පවුල් 400ක් වෙනුවෙන් සහන ණයක් ලබාදීම ද සිදු කෙරෙනවා. ධීවර බෝට්ටු ඇතුළු ධීවර කර්මාන්තය සඳහා අවශ්‍ය අනෙකුත් ආම්පන්න සැපයීම ද මෙම වැඩසටහනේ තවත් අරමුණක් වනවා.

තවද තල්, කිතුල් සහ පොල් වැනි බෝග සඳහා ප්‍රමිතිගත “රා බලපත්‍ර” ලබාදීමට ද කටයුතු කරනවා. කෘතීම නිෂ්පාදන වෙනුවට, ස්වාභාවික මධ්‍යසාර නිපදවා දෙස් විදෙස් අළෙවිය සඳහා මුදා හැරීමට කටයුතු කරනවා.

එමෙන්ම පශු සම්පත් අමාත්‍යාංශය හරහා කළුතර සහ කුරුණෑගල දිස්ත්‍රික්ක කේන්ද්‍ර කරගනිමින් ගම් කුකුළු ගොවිපොල ව්‍යාපෘති 10,000ක් ආරම්භ කිරීමට ද බලාපොරොත්තු වනවා.

මෙහිදී අපගේ අපේක්ෂාව වී තිබෙන්නේ නිෂ්පාදන ආර්ථිකය සවිමත් කිරීමට දායකත්වය සැපයීමයි.

ඒ වගේම චීනයේ චොංචිං ප්‍රාන්තයේ වෘත්තීය පුහුණු ආයතන 33ක් සමඟ ගිවිසුම් කිහිපයකට අත්සන් තැබීමට අප අමාත්‍යාංශය කටයුතු කළා. ඒ හරහා චීනයේ සහාය ඇතිව අපගේ වෘත්තිකයින් ලක්ෂයකට පුහුණුව ලබාදීමට නියමිතයි. මෙම වසර තුළ දී මේ අකාරයට ලක්ෂ 03ක ප්‍රජාවක් සවිබලගැන්වීම අපගේ බලාපොරොත්තුවයි.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.