Published on: මාර්තු 29, 2024

අභිනව පදවිවලින් පිදුම් ලද පූජ්‍ය මහරගම නන්ද නාහිමිපාණන් වහන්සේට ශ්‍රී සන්නස් පත්‍ර පිළිගැන්වීම ජනපති සහභාගීත්වයෙන්

කොල්ලුපිටිය, වාළුකාරාම මහා විහාරය ඇතුළු පංචමහා විහාරාධිපති පූජ්‍ය මහරගම නන්ද නාහිමිපාණන් වහන්සේට ස්‍යාමෝපාලිවංශික මහානිකායේ ශ්‍රි කල්‍යානි සාමග්‍රී ධර්ම මහා සංඝ සභාවේ රත්මලාන විහාර පාර්ශ්වයේ උතුම් උපාධ්‍යාය පදවිය හා කොළඹ දිසාව සහිත ඌව පළාතේ ප්‍රධාන සංඝනායක පදවිය පිළිබඳ ශ්‍රී සන්නස් පත්‍ර ප්‍රදානෝත්සවය ජනාධිපති රනිල් වික්‍රමසිංහ මහතාගේ සහභාගීත්වයෙන් මහරගම, නාවින්න ඉසිපතනාරාම විහාරස්ථානයේ දී අද (29) පෙරවරුවේ පැවැත්විණි.

උගත් වියත් මහා යථිවරයාණන් වහන්සේ නමක් වන පූජ්‍ය මහරගම නන්ද ස්වාමීන් වහන්සේ ඉටුකරන ශාසනික සහ සමාජයීය මෙහෙවර අගයමින් මහා විහාර වංශික ස්‍යාමෝපාලි මහා නිකායේ ශ්‍රි කල්‍යානි සාමග්‍රී ධර්ම මහා සංඝ සභාවේ රත්මලාන විහාර පාර්ශ්වය විසින් මෙම අභිනව ධූරය උන්වහන්සේ වෙත පිරිනමා තිබේ.

ඊට අදාළ සන්නස් පත්‍ර පිළින්වීම සියම් මහා නිකායේ කෝට්ටේ ශ්‍රී කල්‍යානි සාමග්‍රි ධර්ම මහා සංඝ සභාවේ මහානායක අතිපූජ්‍ය ඉත්තෑපානේ ධම්මාලංකාර මහනාහිමිපාණන් වහන්සේ විසින් සිදු කළ අතර, විජිණිපත පිළිගැන්වීම ජනාධිපති රනිල් වික්‍රමසිංහ මහතා අතින් සිදු විය.

මහාවිහාර වංශික ස්‍යාමෝපාලි මහානිකායේ මල්වතු මහාවිහාර පාර්ශ්වයේ අනුනායක, ආචාර්ය පූජ්‍ය නියංගොඩ විජිතසිරි නාහිමිපාණන් වහන්සේ පුණ්‍යෝත්සවයේ දී විශේෂ අනුශාසනාවක් සිදු කළහ.

මහාවිහාරවංශික ස්‍යාමෝපාලි මහානිකායේ අස්ගිරි විහාර පාර්ශ්වයේ අනුනායක පූජ්‍ය ආනමඩුවේ ධම්මදස්සි අනුනායක හිමිපාණන් වහන්සේ, මහාවිහාරවංශික ස්‍යාමෝපාලි මහානිකායේ මල්වතු විහාර පාර්ශ්වයේ ප්‍රධාන ලේඛකාධිකාරි, ඓතිහාසික සෝමාවති චෛත්‍යාරාමාධිපති පූජ්‍ය පහමුණේ සුමංගල ස්වාමින් වහන්සේ, මහාවිහාරවංශික ස්‍යාමෝපාලි මහානිකායේ ශ්‍රී කල්‍යාණි සාමග්‍රීධර්ම මහා සංඝ සභාවේ මහානායක පුජ්‍ය මල්වානේ පඤ්ඤාසාර ස්වාමින් වහන්සේ, උඩරට අමරපුර මහනිකායේ වැඩබලන මහානායක පූජ්‍ය නිකපොත චන්දජොති මහනාහිමිපාණන් වහන්සේ, රත්මලාන පරමධම්ම චේතිය පිරිවෙන් කෘත්‍යාධිකාරි මහාවිහාරවංශික ස්‍යාමෝපාලි මහානිකායේ ශ්‍රී කල්‍යාණි සාමග්‍රිධර්ම මහා සංඝ සභාවේ නියෝජ්‍ය ලේඛකාධිකාරි ආචාර්ය පූජ්‍ය මාඉටිපේ විමලසාර හිමිපාණන් වහන්සේ, පූජ්‍ය උඩවෙල කෝලිත හිමිපාණන් වහන්සේ ප්‍රමුඛ මහා නායක, අනුනායක හිමිවරුන් ප්‍රමුඛ ත්‍රෛනිකායික මහා සංඝරත්නය ද, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, පාර්ලිමේන්තු මන්ත්‍රී ගාමිණී ලොකුගේ, හිටපු පාර්ලිමේන්තු මන්ත්‍රී ඩික්සන් ජේ. පෙරේරා, නාවික හමුදාපති වයිස් අද්මිරාල් ප්‍රියන්ත පෙරේරා යන මහත්වරුන් සහ දායක සභාවේ සාමාජිකයන් ඇතුළු පිරිසක් මෙම අවස්ථාවට එක්ව සිටියහ.

මෙහෙවර

ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.