සංචාරක හෝටල් ආශ්‍රිත වෙරළ කලාපවල පවිත්‍රතාව රැක ගැනීමේ අරමුණින් හෝටල් වෙරළ රැකබලා ගන්නන් පත් කිරීමේ ව්‍යාපෘතියක් හඳුන්වා දී තිබෙන අතර එම වැඩසටහන අද (04) පෙරවරුවේ හබරාදුව ප්‍රාදේශීය ලේකම් කාර්යාල පරිශ්‍රයේදී ආරම්භ කෙරිණි.
සමුද්‍රීය පරිසර ආරක්ෂණ අධිකාරිය හා අදාළ සංචාරක හෝටල් අතර ඒ සඳහා වන අවබෝධතා ගිවිසුමකට අත්සන් තැබිමද සිදු කෙරිණි. සංචාරක හෝටල් ආශ්‍රිත වෙරළ කලාපය රැක ගැනීම වෙනුවෙන් ප්‍රදේශවාසියකු පත් කිරිම මෙහිදී සිදු වන අතර ඒ වෙනුවෙන් එම පුද්ගලයාට දීමනාවක්ද ගෙවනු ලැබේ.
“සුන්දර වෙරළ තීරයක් – ආකර්ෂණීය සංචාරක ගමනාන්තයක් ” යන තේමාවට අනුව “ක්ලීන් ශ්‍රී ලංකා” වැඩසටහන යටතේ රාජ්‍ය, පුද්ගලික හා මහජන යන අංශ ආවරණය වන පරිදි මෙම ව්‍යාපෘතිය ක්‍රියාත්මකය.
දිවයින පුරා විහිදී ඇති වෙරළ තීරයේ පවිත්‍රතාව රැක ගැනීම සංචාරක කර්මාන්තයේ දියුණුවට බෙහෙවින් ඉවහල් වන අතර, සමුද්‍ර සංරක්ෂණ ප්‍රධාන සැලැස්මේ කොටසක් ලෙස, අන්තර්ජාතික මට්ටමින් පිළිගැනෙන බිලු ෆ්ලෑග් සහතිකය ( Blue flag certification) ශ්‍රී ලංකාවට හිමි කර ගැනීමටද මෙම ව්‍යාපෘතිය දායක වනු ඇත.
හබරාදුව ප්‍රාදේශීය සභාවේ සභාපති හර්ෂ බී පුංචිහේවා, දකුණු පළාත් ආණ්ඩුකාර ලේකම් ඉන්දික සමරකෝන්, ගාල්ල අතිරේක දිස්ත්‍රික් ලේකම් අයේෂා කාරියවසම් යන මහත්ම මහත්මීහු මෙම අවස්ථාවට එක්ව සිටියහ.
ජනාධිපති මාධ්‍ය අංශය අතිගරු ජනාධිපතිතුමාගේ දැක්ම, ක්‍රියාමාර්ග, තීරණ, ප්‍රකාශ තත් අයුරින්ම මාධ්‍ය තුලින් සමාජගත කිරීමට පූර්ණ වශයෙන් වග වන්නේය. ඒ සඳහා විශ්වාසනීය වූත් ආකර්ෂණීය වූත් ප්‍රවේශයක් මගින් විද්‍යුත්, මුද්‍රිත සහ නව මාධ්‍ය දායක කර ගැනේ. මාධ්‍ය අංශය රාජ්‍ය සහ පෞද්ගලික මාධ්‍ය ආයතන හා මාධ්‍යවේදීන් සමඟ මනා සම්බන්ධීකරණයක් පවත්වා ගනිමින් ජනාධිපතිතුමාගේ දැක්ම හා මෙහෙවර විෂයයෙහි තොරතුරු මූලාශ්‍රයක් ලෙස ක්‍රියා කරයි. ඉහළ ප්‍රමිතියකින් යුත් මාධ්‍ය භාවිතයක් ඔස්සේ ජාතික ප්‍රතිපත්ති, සැලසුම් හා ක්‍රියාමාර්ග ජනතාවට පැහැදිලි කරයි. දුර්මත හඳුනා ගෙන සත්‍යය අනාවරණය කරයි.
